काठमाडौं। सर्वोच्च अदालतबाट नेपाली कांग्रेसको आधिकारिता विशेष महाधिवेशनबाट निर्वाचित गगनकुमार थापा नेतृत्वले पाएसँगै निवर्तमान सभापति शेरबहादुर देउवा समूहले आगामी रणनीति तय गर्न छलफललाई तीव्रता दिएको छ ।सर्वोच्च अदालतबाट आफ्नो पक्षमा निर्णय नआएसँगै देउवा पक्ष रक्षात्मक बनेको हो ।
पार्टीमा आगामी रणनीति कस्तो अपनाउने भनेर यो समूहका नेता पूर्णबहादुर खड्काले विभिन्न छलफल गरिरहेका छन् । सोही अनुसार आज देउवा समूहका पूर्व केन्द्रीय सदस्यहरू धुम्बाराहीस्थित स्मार्ट प्यालेसमा भेला भएका छन् ।
यसअघि शनिबार खड्काले आफ्नो निवासमा बोलाएर तत्कालीन पदाधिकारीहरूसँग छलफल गरेका थिए । छलफलले सर्वोच्च अदालतको निर्णयमा असहमति भए पनि स्वीकार गर्ने निष्कर्ष निकालेको थियो । आजको भेलामा पूर्णबहादुर खड्का, कृष्ण सिटौला, विमलेन्द्र निधि, प्रकाशमानसिंहलगायत नेताहरू सहभागी छन् । आजको भेलाले पार्टीमा कसरी प्रस्तुत हुने भन्ने रणनीति तय गर्ने नेताहरूले बताएका छन् ।
