काठमाडौं । नेपाली काँग्रेसका सांसद मोहन आचार्यले रसुवा–त्रिशूली करिडोर क्षेत्रमा आएको भीषण बाढीबाट ठूलो मानवीय तथा भौतिक क्षति भएको भन्दै बाढीलाई राष्ट्रिय विपद् घोषणा गरी तत्काल उद्धार तथा राहतमा जुट्न सरकारसँग आग्रह गरेका छन् ।
प्रतिनिधि सभाको बुधवारको बैठकमा बोल्दै उनले यस्तो माग गरेका हुन् । उनले भोटेकोसी खोलामा आएको बाढीले रसुवागढीदेखि तलका तटीय क्षेत्रमा रहेका बस्ती, पक्की पुल तथा जलविद्युत् आयोजनालगायतका संरचना बगाएको उल्लेख गरे। उनले रसुवामा आएको बाढी यस शताब्दीकै ठुलो विपत्तीमध्ये एक भएको समेत बताए । उनले सडक सञ्जाल विच्छेद भएका कारण हेलिकप्टरबाहेक उद्धार सम्भव नभएको भन्दै उपलब्ध सबै हेलिकप्टर तत्काल रसुवा पठाउन सरकारसँग आग्रह समेत गरे।
उनले भने, ‘आज बिहान भोटेकोसी खोलामा आएको बाढीले रसुवागडीदेखि तलको तटीय क्षेत्रमा रहेका बस्ती पक्कीपुल, जलविद्युत आयोजना लगायतका संरचनाहरु बगाएको छ । प्रारम्भिक अनुमानमा ठुलो संख्यामा मानवीय क्षति भएको छ । यस किसिमको विपत्ती यो शताब्दीकै पहिलो हो जस्तो लाग्छ । म सरकारलाई राष्ट्रिय विपद् घोषणा गरी उद्धार र राहतमा लाग्न अनुरोध गर्दछु । उद्धार गर्नुपर्ने मानिसको संख्या ठुलो रहेको छ । र उद्धारको लागि हारगुहार गरिरहेका छन् । सडकसञ्जाल विच्छेद हुँदा हेलिकेप्टरबाहेक उद्धार सम्भव छैन । उपलब्ध भएका हेलिकेप्टर तत्काल रसुवा पठाउन अनुरोध गर्दछु ।’
उनले रसुवा लगायत प्रभावित जिल्लामा हजारौँ नागरिक उद्धारको पर्खाइमा रहेको समेत बताए ।
