काठमाडौं । नेकपा माओवादी केन्द्र र नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टीबीचको बहुप्रतीक्षित पार्टी एकता प्रक्रिया अनिश्चित बनेको छ । यही अन्योलबीच माओवादी केन्द्रका वरिष्ठ उपाध्यक्ष नारायणकाजी श्रेष्ठ र नेकपा महासचिव नेत्रविक्रम चन्द ‘विप्लवबीच बुधबार एक घण्टा लामो संवाद भएको छ ।

काठमाडौंमा दुई नेताबीच करिब एक घण्टा लामो भेटवार्ता भएको हो । बैठकमा समसामयिक राजनीतिक परिस्थिति, वामपन्थी एकता सम्भावना र सरकारको वर्तमान अवस्थाबारे छलफल भएको बताइएको छ। यो भेट वार्ता त्यसबेला भएको हो जब विप्लव नेतृत्वको नेकपाले माओवादीसँग पार्टी एकता नगरी आफ्नो नेतृत्वमा फरक राजनीतिक केन्द्र निर्माण गर्ने निर्णय गरिसकेको छ ।

विप्लव पक्षले माओवादी केन्द्रप्रति आलोचनात्मक धारणा राख्दै आएको छ । उसले आफूलाई ‘सच्चा क्रान्तिकारी धार’ को प्रतिनिधि बताउँदै छुट्टै पहिचान निर्माणको कोसिसमा देखिन्छ ।