काठमाडौं । भूमि व्यवस्था, सहकारी तथा गरिबी निवारणमन्त्री बलराम अधिकारीले भूमिहिन सुकुम्वासी, अव्यवस्थित बसोवासीहरुलाई जग्गा प्राप्ति निवेदन दिन सरकारले तेस्रो चरणमा ३५ दिनको सूचना जारी गर्ने बताएका छन् । बिहीवार सिंहदरबारमा बसेको कृषि, सहकारी तथा प्राकृतिक श्रोत समितिको बैठकमा बोल्दै उनले यस्तो बताएका हुन ।

उनले विस्थापित भएर आउनुभएकाहरुले पनि अव्यवस्थितअन्तर्गत फर्म भर्नसक्ने बताए । आरक्षणहरु, अव्यवस्थित, विस्थापितहरु, हली, गोठाला, हरुवाचरुवाहरुलाई पनि ३५ दिने सूचनाअन्तर्गत आवेदन दिन उनले आग्रह गरे । कोही पनि नागरिक आफ्नो घरबास पाउने अधिकारबाट वञ्चित हुन नदिन सरकारले काम गरिरहेको भन्दै मन्त्री अधिकारीले ऐनले नतोकेको कुरा मन्त्रालयले स्वीकृत गर्न नसक्ने बताए ।

ऐनले तोकेर, मापदण्ड बनाएर, हाउजिङ, फार्मिङ गर्छु भनेर कसैले निवेदन दिएको खण्डमा मात्रै उपयुक्त छ की छैन जग्गा दिने भनेर अध्ययन गरेर मात्रे दिने गरिएको मन्त्रीको भनाई छ । घरजग्गा व्यवसायीहरुले स्वीकृति लिएको जग्गा र सूचित आदेशले तोकेको आधारमा रहेर नै वर्गीकरण गर्दा कृषि क्षेत्रका लागि प¥यो भने कृषि क्षेत्रको प्रयोजनका लागि मात्रै बेच्न पाउने उनको भनाई छ ।

मन्त्री अधिकारीले भने, ‘विस्थापित भएर आउनुभएकाहरु पनि अव्यवस्थितमा पर्नुहुन्छ । सरकारले कानूनले त मुक्त कमैया उन्मुलन भयो भनियो । तर पनि कतिपय पहाडका हली गोठालाहरु हुनुहुन्छ । उहाँहरु छुट्नुभएको छ । उहाँहरु धेरै आउनुभएको थियो । कैलाली, कञ्चनपुर, मकनवापुरबाट आउनुभयो ।

कहीँ पनि कमाएर बस्नुभएको छैन भने जुन पालिकामा जसको कमाएर बस्नुभएको हो । त्यहीँ गएर त्यस आयोगसँग सम्पर्क गरेर भर्नुस् । सूचना नगएको ठाउँ छ, अहिलेसम्म जानकारी छैन भन्नुभएको छ, त्यो विगतमा भएको, सूचना नपुगेको अनुभुति गरेर नै आयोगले ३५ दिने सूचना निकाल्दैछ । अब निकाल्ने हो नि तेस्रो चरणको । सबैका निम्ति निस्किन्छ । आरक्षणहरु, अव्यवस्थित, विस्थापितहरु, हली, गोठाला, हरुवाचरुवाहरु जो छन् । उनीहरुले पनि पाउनुप¥यो । यि सबैका निम्ति एक पटक खोलिन्छ । पालिकामा जहाँ बस्नुभएको छ त्यही वाडबाट भर्ने हो ।’