काठमाडौं। अल्फाबोट २ अत्याधुनिक सहयोगी रोबोटहरूको नयाँ पुस्ता हो । जसले हालैका दिनहरूमा चिनियाँ अटोमोबाइल कारखानाहरूमा मानव कामदारहरूसँग काँधमा काँध मिलाएर काम गरिरहेको छ ।

यी रोबोटहरू परम्परागत औद्योगिक रोबोटहरू भन्दा फरक छन् किनभने यिनीहरूलाई सुरक्षा पिंजरा बिना नै मानिसहरूको नजिकै काम गर्न मिल्ने गरी डिजाइन गरिएको छ । विशेष गरी विद्युतीय सवारी साधन उत्पादन केन्द्रहरूमा यिनीहरूको तैनाथी तिब्र गतिमा भइरहेको छ । कामको भुमिकाको सन्दर्भमा, अल्फाबोट २ ले गुणस्तर जाँच र एसेम्बलीमा महत्वपूर्ण भुमिका खेल्छ । यसमा जडान गरिएको उन्नत एआई क्यामेरा प्रणालीले मानिसको आँखाले देख्न नसक्ने सूक्ष्म त्रुटिहरू पत्ता लगाउँछ । साथै, यसले गाडीका साना र जटिल पार्टपुर्जाहरू जोड्ने काममा उच्च परिशुद्धता प्रदान गर्दछ । जसले गर्दा उत्पादन लाइनमा हुने मानवीय त्रुटिहरू लगभग समाप्त भएका छन् ।

लजिस्टिक र मर्मतसम्भारको क्षेत्रमा पनि यी रोबोटहरू अब्बल साबित भएका छन् । अल्फाबोट २ ले कारखानाभित्र भारी सामग्रीहरू एक ठाउँबाट अर्को ठाउँमा सुरक्षित रूपमा ओसारपसार गर्छन । यसबाहेक, यिनीहरूले इन्टरनेट अफ थिंग्सको प्रयोग गरी अन्य मेसिनहरूको अवस्थाको निगरानी गर्छन् र कुनै मेसिन बिग्रनुअघि नै मर्मतको आवश्यकताबारे जानकारी दिन्छन् । जसले अनपेक्षित रूपमा काम रोकिने समस्या कम गरेको छ ।

समग्रमा अल्फाबोट २ को प्रयोगले चिनियाँ अटो उत्पादन क्षेत्रमा गहिरो प्रभाव पारेको छ । यसले उत्पादन लागत घटाउनुको साथै उत्पादनको गतिलाई बढावा दिएको छ । यस प्रविधिको सफल कार्यान्वयनले चीनलाई स्मार्ट म्यानुफ्याक्चरिङ र उद्योग ४।० को विश्वव्यापी नेताको रूपमा स्थापित गर्न मद्दत पु¥याएको छ । जहाँ प्रविधि र मानवीय सीपको उत्कृष्ट संयोजन देख्न सकिन्छ ।