काठमाण्डौ । लुम्बिनी, गण्डकी र कर्णाली प्रदेशसहित देशका विभिन्न ठाउँमा शनिबार बिहानैदेखि पानी परेको छ ।

ती क्षेत्रका केही ठाउँमा मेघगर्जन र चट्याङ्गसहित मध्यमसम्मको वर्षा र हिमपात भैरहेको जल तथा मौसम पूर्वानुमान महाशाखाले जनाएको छ । आज कोशी, मधेश, बागमती र गण्डकी प्रदेशका धेरै ठाउँहरू, लुम्बिनी र कर्णाली प्रदेशको केही तथा सुदुरपश्चिम प्रदेशको थोरै ठाउँमा मेघगर्जन, चट्याङ्ग, असिना, हावाहुरीसहित मध्यम वर्षारहिमपातको सम्भावना रहेको छ ।

कोशी, मधेश र लुम्विनीको एक–दुई ठाउँमा ठूलो पानी पर्न सक्ने सम्भावना रहेको महाशाखाले जनाएको छ । महाशाखाका अनुसार दिउँसोपछि मध्य र पूर्व क्षेत्रमा हावाहुरी, मेघगर्जन, चट्याङ र असिनासहित मध्यम वर्षा हुने सम्भावना छ ।

यस्तै उच्च पहाडी तथा हिमाली क्षेत्रमा हिमपात भएको छ । आज रातिदेखि मौसममा क्रमिक सुधार हुने महाशाखाले जनाएको छ ।

हावाहुरीका बेला रुख ढल्ने, कमजोर संरचना र छाना उडाउने, विद्युत तथा सञ्चार सेवा साथै हवाई तथा सडक यातायात समेत प्रभावित हुने जोखिम रहन सक्ने हुँदा त्यसको असरबाट बच्न आवश्यक उपाय तथा सतर्कता अपनाउन महाशाखाले आग्रह गरेको छ ।