काठमाडौँ ।राष्ट्र निर्माण दलका अध्यक्ष समिम मियाँ अन्सारीले संघिय निजामति विधेयकलाई संसदबाट पारित गर्ने व्यवस्था मिलाउन सभामुखसँग माग गर्नुभएको छ । अन्सारीले सोमवार सभामुख डोलप्रसाद अर्याललाई भेटेर निजामती विधेयकलाई पारित गर्न माग गरेका हुन् ।

संविधान जारी भएको करिव ११ वर्ष बितिसक्दा पनि निजामतिसम्बन्धी ऐन बन्न नसक्दा मुस्लिम तथा थारु समुदायका युवा अवसरबाट वञ्चित हुनुपरेको उनको भनाइ छ । उनले संसदबाट विधेयक पारित नहुँदा मुस्लिम समुदाय र थारु समुदाय राज्यका अवसरबाट अझै पनि वञ्चित भइरहेको बताए । लोकसेवा आयोगको फारम भर्ने प्रक्रियामा समेत मुस्लिम वा थारु क्लस्टरको व्यवस्था नभएको उनको भनाई छ । सभामुखलाई उक्त विधेयकलाई प्राथमिकतामा राखी तत्काल पारित गर्न ध्यानाकर्षण गराएको जानकारी दिए ।

अन्सारीले निजामति विधेयक पारित भएमा उत्पिडनमा परेका मुस्लिम तथा थारु विद्यार्थीले लोकसेवामा सहज रुपमा भाग लिन पाउने बताए । सभामुख अर्यालले बाँकी रहेका कानून निर्माणका कामलाई तिब्रता दिने प्रतिवद्धता जनाएउनुभएको उहाँले जानकारी दिए ।