काठमाडौं । नेपाली कांग्रेसका नेता कृष्ण सिटौलाले केन्द्रीय कार्यसम्पादन समितिले गरेको निर्णय कार्यान्वयन गर्नु नै पार्टीको एकता भएको बताएका छन् ।

शुक्रबार काठमाडौंमा बसेको कांग्रेस संस्थापन पक्षको भेलापछि सञ्चारकर्मीसंग कुरा गर्दै सिटौलाले विशेष महाधिवेशन अहिलको आवश्यकता नभएको भन्दै पार्टीलाई एकताबद्ध ढंगले अघि बढाउन केन्द्रीय कार्यसम्पादन समितिले गरेको निर्णय कार्यान्वयन गर्नुपर्ने बताएका हुन् ।

अहिले पार्टीका नेताहरुकाबीचमा प्रतिष्पर्धा गर्ने बेला नभइ निर्वाचनमा पार्टी एकताबद्ध भएर जाने बेला भएको उनको भनाइ छ । उनले आफुहरु पार्टी एकताको पक्षमा, समझदारीको पक्षमा, कार्य सम्पादन समितिले गरेको निर्णयको पक्षमा लागिरहने उल्लेख गरे ।

विशेष महाधिवेशनको पक्ष वा बिपक्षमा कति छन् भन्ने अलग कुरा रहेको भन्दै सिटौलाले विशेष महाधिवेशन आजको आवश्यकता नरहेको स्पष्ट पारे ।

पार्टी जोगाउनलाई के गर्नुहुन्छ भन्ने सञ्चारकर्मीको प्रश्नमा सिटौलाले सर्वसम्मत वा बहुमत जेबाट भएपनि पार्टीले गरेको निर्णयको पालना गर्नु नै पार्टीको हितमा र पार्टी एकताको पक्षमा हुने उनको भनाइ छ ।