काठमाडौं । राष्ट्रिय स्वतन्त्र पार्टीकी सांसद लिमा अधिकारीले किसानहरुको भुक्तानी १५ दिनभित्र अनिवार्य भुक्तानी हुनेगरी आवश्यक कानूनी व्यवस्था गर्न सरकारसँग माग गरेका छिन् ।

बिहीवार प्रतिनिधि सभा बैठकमा बोल्दै उनले उखु किसान, दुध किसान लगायतको भुक्तानी वर्षौसम्म पनि हुन नसकिरहेको दृष्टान्त पेश गर्दै सरकारसँग उक्त माग गरेकी हुन् । सांसद अधिकारीले किसानको पसिनाको मूल्य दिने कुरामा हिच्किचाउने कार्यले मुलुकलाई समृद्ध बनाउन नसक्ने तथ्यलाई पनि सरकारले हेक्का राखेर काम गर्नुपर्ने बताइन् । उनले किसानले समयमा आफनो वस्तुहरुको उचित मूल्य नपाउँदा युवाहरु उर्वर भूमि छोडेर विदेशिन बाध्य हुनुपरेकोतर्फ पनि सरकारको गम्भिर ध्यानाकर्षण गराइन् ।

उनले भनिन् ,‘हाम्रो कृषि प्रदान देशमा आज किसानको आँशुले माटो भिजिरहेको छ । मकवानपुरका दुध किसानको मात्रै १४ करोड भन्दा बढी भुक्तानी दिन बाँकि छ । यो समस्या एउटा जिल्लाको मात्रै होइन सभामुख महोदय । देशभरका उखु, दुध, धानलगायतका धेरै उत्पादक किसानहरुको यो साझा समस्या हो । जव एउटा किसानले आफनो पसिनाको मूल्य पाउन महिनौ, वर्षौ कुर्नुपर्छ । तब उसले गाईभैसीको दाना र छोराछोरीको स्कुलको फि कसरी समयमा तिर्छ रु त्यसैकारण आज ऊर्जावान युवाहरु आफनो उर्वर जमिनलाई बाँझो छाडेर खाडीको मरुभूमि रोज्न बाध्य छन सभामुख महोदय । किसानको खल्ती रित्तो बनाएर देशमा समृद्धि कदापी ल्याउन सकिदैन । मुलुकमा खाद्यन्न मात्रै होइन सभामुख महोदय । खाद्य आत्मनिर्भरता चाहिएको छ । अत म सरकारसँग माग गर्दछु–किसानको भुक्तानी १५ दिनभित्र अनिवार्य फस्र्यौट गर्ने कानूनी ग्यारेन्टी गरियोस् ।’

सांसद अधिकारीले मुलुकमा खाद्य आत्मनिर्भरता चाहिएको उल्लेख गर्दै त्यसका लागि आवश्यक व्यवस्था मिलाउन पनि सरकारलाई सचेत गराइन्।