काठमाडौं । अविरल वर्षा र त्यसपछि आएको बाढी पहिरोको कारण मकवानपुरको एन्फा सिस्नेरी क्याम्पसका ६ जना विद्यार्थीले ज्यान गुमाएका छन् । जिल्ला प्रहरी कार्यालय मकवानपुरका अनुसार पहिरोले पुरिएको अवस्थामा ६ जना विद्यार्थीको शव फेला परेको हो ।

कुलेखानी जलविद्युत आयोजनाको इन्द्र सरोवर भरिएर शनिवार बिहान जलाशयको २ वटै ढोका खोलिएपछि विद्यालयको छात्रावासबाट सुरक्षित स्थलतर्फ सार्न खोज्दा उनीहरूको पहिरोमा पुरिएर मृत्यु भएको बताइएको छ ।

क्याम्पमा रहेका अन्य विद्यार्थी सुरक्षित रहेको प्रहरी कार्यालय मकवानपुरले जानकारी दिएको छ । सुरक्षित रहेका ३४ जनालाई भने नेपाली सेनाको हेलिकोप्टरमार्फत काठमाडौँ लैजान तयारी छ । इन्द्रसरोवर गाउँपालिका–३ स्थित वल्सलादेवी माविमा सञ्चालित एन्फा एकेडेमीमा अध्ययनसँगै ४० बालक बन्द प्रशिक्षणमा रहेका थिए ।