काठमाडौं। राष्ट्रिय स्वतन्त्र पार्टी रास्वपाका सभापति रवि लामिछानेले आफनो पार्टीले आसन्न निर्वाचनमा पाँच वर्ष स्थायी सरकार चलाउने म्याण्डेटको अपेक्षा गरेको बताएका छन् ।

बुधवार सुदूरपश्चिमको धनगढीका आयोजित पार्टीको चुनावी सभामा बोल्दै उनले सो कुरा बताएका हुन् । सभापति लामिछानेले जनताको अधिकारलाई माग बनाएर चुनावी घोषणा पत्रमा बल्ढयाङ्ग्रे अक्षरले लेख्ने तर पूरा नगर्नेहरुको युगलाई आफूहरुले अन्त्य गर्न चाहेको समेत बताए । सभापति लामिछानेले आम मतदाताले अब चुनावका बेला गरिएका वाचा पूरा नगर्नेहरुलाई आसन्न निर्वाचनमा सजाय दिनुपर्ने समेत बताए । चुनावका बेला जनतासँग गरिएका वाचा पूरा नगर्ने विकृति अव नचल्ने सभापति लामिछानेको भनाई थियो ।

उनले भने,‘रास्वपाले राजनीतिक विकृति र विसंगति मध्येको एक रहेको जनताको अधिकारलाई माग बनाएर हरेक चुनावमा घोषणा पत्रमा बल्ढयांग्रे अक्षरले लेख्ने युगलाई अन्त्य गर्छ । जनताको माग हो । त्यसलाई पूरा गर्ने हो । त्यसकारण हामीले ५ वर्षको स्थायी सरकार यस पटक मागेका छौँ । पहिलो पटक नेपालको इतिहासमा कुनै राजनीतिक दलले जनतासँग कन्ट्रयाक्ट गरेको छ । जनताले भोट दिने, जनतालाई नेताले वाचा गर्ने, अनि सजाय पनि त्यही भोट दिने जनताले पाउने रु अब यस्तो चल्दैन । अब यस्तो चल्दैन । वाचा जसले गरेको हो, पूरा नगर्ने हो भने सजाय त्यसैले पाउने हो । जनताले सजाय पाउने होइन । यसका लागि ५ वर्षको स्थायी सरकारको हामीले अपेक्षा गरेका छौँ । आज मलाई धेरै लामो केही पनि भन्नुछैन ।’

सभापति लामिछानेले राजनीतिमा देखिएको तमाम खालको विकृतिको अन्त्य गर्न आफूहरु प्रतिवद्ध रहेको पनि बताए ।