काठमाडौं । नेकपा (माओवादी केन्द्र)का महासचिव देव गुरुङले वर्तमान शासकीय प्रणालीमाथि नेकपा एमाले अध्यक्ष एवं प्रधानमन्त्री केपी शर्मा ओलीबाटै चुनौती रहेको आरोप लगाएका छन् ।

प्रधानमन्त्री ओलीले व्यवस्थामाथि हरेक दिन आक्रमण गर्दै आएको उनले आरोप लगाएका हुन् । उनले प्रधानमन्त्री ओली पार्टी फुटाउने र राज्यका अंगहरु छिन्नभिन्न बनाउने काममा लागेको जिकिर गरे ।

महासचिव गुरुङले अहिलेको प्रश्न ०८४ मा निर्वाचन हुन्छ की हुँदैन भन्ने भन्दा पनि अहिलेको व्यवस्था बँच्छ की बँच्दैन भन्ने चिन्ताको विषय रहेको बताए । न्युज एजेन्सी नेपालसँगको कुराकानीमा महासचिव देव गुरुङले यो सदन ०८४ सम्मै सुचारु हुनसक्नेमा पनि आशंका व्यक्त गरे ।

उनले भने, ‘०८४ सम्म पुग्दा वृहत्तर रुपमा कम्युनिष्ट एकीकरण हुनेवाला छ । एकतावद्ध हुन्छ । आउँदो ०८४ को निर्वाचनमा मुलुकमा फस्र्ट पार्टी बन्ने र बनाउने प्रक्रियामा माओवादी पुग्छ । अहिले फस्र्ट पार्टी हुन्छ की हुँदैन भन्ने प्रश्न भन्दा पनि ०८४ मा चुनाव हुन्छ की हुँदैन, यो व्यवस्था बँच्छ की बच्दैन । यो सदन बँच्छ की बँच्दैन भन्ने चिन्ताको विषय हो । यो व्यवस्था बँच्छ की बँच्दैन भन्नेमै च्यालेन्ज छ । अहिलेको लडाईं त त्यहाँ केन्द्रित छ ।’

उनले प्रधानमन्त्री ओली शान्ति सम्झौताको विपक्षमा रहेको बताउँदै उनको सोच वर्तमान व्यवस्था जोगाउनेतिर नरहेको आरोप लगाए । लोकतन्त्र, संविधान, राष्ट्रियतालाई रक्षा गर्नुपर्छ भन्ने मोडलमा सबै राजनैतिक दल आगाडी गए मात्र अहिलेको व्यवस्था बच्ने उनले बताए । उनले अहिलेको लडाईं व्यवस्था जोगाउनका लागि हुनुपर्नेमा जोड दिए ।

महासचिव गुरुङले प्रधानमन्त्री ओलीले कुनैपनि बेला शक्तिकेन्द्रको उक्सावटमा आएर व्यवस्थामाथि प्रहार गर्नसक्ने आरोप लगाए । उनले ०८४ सम्म वृहत्तर कम्युनिष्ट एकीकरण हुने पनि बताउँदै कम्युनिष्टहरु नै मुलुकमा पहिलो ठूलो पार्टी बन्ने बताए ।

‘वृहत शान्ति सम्झौताको विपक्षमा रहेको अभिमत भएको एमालेको नेतृत्व अहिले सरकारको नेतृत्व छ । उहाँको सोच र विचारको हिसावले हेर्दा दोबाटोमा छ । डेकमोक्रेसीलाई रक्षा गर्नुपर्छ, संविधानको रक्षा गर्नुपर्छ, राष्ट्रियतालाई रक्षा गर्नुपर्छ भन्ने मोडलमा गयो भने यो व्यवस्था बँच्छ, ०८४ मा चुनाव पनि हुन्छ, होइन उहाँको संकीको आधारमा पदप्रतिष्ठाको लागि कतिपय शक्ति केन्द्रको उक्सावटको आधारमा यो व्यवस्थामाथि प्रहार हुन सक्दैन भनेर भन्न सकिँदैन । दुई दुई पटक प्रहार भएको इतिहास छ ।’, उनले भने ।