काठमाडौं। श्रम, रोजगार तथा सामाजिक सुरक्षा मन्त्रालयले श्रमिक एवं कर्मचारीलाई सरकारले तोकेको न्यूनतम पारिश्रमिक दिलाउन रोजगारदाता संस्थालाई चेतावनीसहित सचेत गराएको छ ।

सोमबार एक विज्ञप्ति जारी गर्दै मन्त्रालयले सचेत गराएको हो । अस्पताल, स्वास्थ्य संस्था, निजी तथा संस्थागत विद्यालयलगायत विभिन्न प्रतिष्ठानमा कानुनको उल्लंघन भइरहेको भन्दै मन्त्रालयले गम्भीर ध्यानाकर्षण भएको जनाएको छ ।विभिन्न अस्पताल तथा स्वास्थ्य संस्थामा ‘इन्टर्न श्रमिक’का रूपमा कार्यरत स्वास्थ्यकर्मी एवं नर्सिङ स्टाफ, निजी विद्यालयका शिक्षक, कर्मचारी र अरू प्रतिष्ठानमा कार्यरत व्यक्तिहरूले तोकिएबमोजिमको न्यूनतम पारिश्रमिक र सुविधा नपाएको गुनासो बढेपछि मन्त्रालयले श्रम ऐन, २०७४ को दफा १८ को उपदफा (३) को कानुनी व्यवस्था स्मरण गराएको छ ।

मन्त्रालयले इन्टर्नका रूपमा काममा लगाइएका व्यक्तिहरूलाई पनि रोजगारदाताले अनिवार्य रूपमा सेवा सुविधा दिनुपर्ने स्पष्ट पारेको छ ।सामाजिक सुरक्षामा कुनै कमी नहुने गरी तालिमी श्रमिकलाई पनि कम्तीमा न्यूनतम पारिश्रमिक, बिरामी बिदा, उपदान, सञ्चयकोष, बिमालगायत सुविधा अनिवार्य रहेको मन्त्रालयले जनाएको छ । मन्त्रालयले यसविपरीत न्यूनतम पारिश्रमिकलगायत सुविधाहरूबाट वञ्चित गराएको पाइएमा प्रचलित कानुन आकर्षित हुने व्यहोरा समेत जानकारी गराएको छ ।