काठमाडौं । काठमाण्डौको बुढानीलकण्ठ नगरपालिका–१३ चुनीखेल नयाँबस्तीमा आगलागी भएको छ ।

गएराति पौने ११ बजेतिरबाट शुरू भएको आगो निभाउन झन्डै ३ घण्टा लागेको थियो । काठमाण्डौ महानगरपालिका, बुढानीलकण्ठ नगरपालिका र टोखा नगरपालिकाको दमकलको सहयोगमा आगो निभाइएको हो ।

आगो लागेलगत्तै ७ जनालाई उद्धार गरिएको थियो । आगलागीका कारण २४ परिवार विस्थापित भएका छन् । आगोले लामो टहरा र त्यहाँ रहेका सरसामान जलेर नष्ट भएका वडाअध्यक्ष टीकानारायण श्रेष्ठले बताए । उनका अनुसार विस्थापितलाई नजिकैका अन्य टहरामा राखिएको छ ।

उनीहरुलाई खाद्यान्न, लत्ताकपडा लगायतका राहत उपलब्ध गराउने तयारी भइरहेको छ । बिजुली सट भएर आगलागी भएको हुन सक्ने प्रारम्भिक अनुमान छ । आगलागीबाट भएको क्षतिको यकिन विवरण आइसकेको छैन ।