काठमाडौं । नेपाली कांग्रेसले गौरीबहादुर कार्की नेतृत्वको जाँचबुझ आयोगको प्रतिवेदन अध्ययन गरेर पार्टीलाई रायसुझाव दिन अध्ययन समिति गठन गरेको छ ।पार्टी केन्द्रीय कार्यालयका कार्यवाहक मुख्यसचिव कृष्णप्रसाद दुलालले बिहीबार एक प्रेस विज्ञप्ति जारी गरेर वरिष्ठ अधिवक्ता यदुनाथ खनालको संयोजकत्वमा पाँच सदस्यीय अध्ययन समितिलाई पूर्णता दिएको जनाएका छन् ।

अध्ययन समितिको सदस्यमा पूर्व न्यायाधिश कृष्णप्रसाद पौडेल, अधिवक्ता विनोद कार्की, अधिवक्ता रामचन्द्र गौतम र युवा अभियन्ता यजश्वी राई छन् ।यो समितिलाई कार्की आयोगको प्रतिवेदन अध्ययन गरी राय-सल्लाह-सुझावसहितको प्रतिवेदन सात दिन भित्र कांग्रेसको केन्द्रीय कार्यालयमा पेस गर्न जिम्मेवारी दिइएको छ ।

भदौ २३ र २४ गते जेनजी आन्दोलनका क्रममा भएका घटनाको जाँचबुझ गर्न पूर्ववती सुशीला कार्की नेतृत्वको अन्तरिम सरकारले पूर्व न्यायाधीश गौरीबहादुर कार्कीको नेतृत्वमा जाँचबुझ आयोग गठन गरेको थियो ।सो आयोगले फागुन २३ गते सरकारलाई प्रतिवेदन बुझाएको थियो । सो प्रतिवेदन सरकार आफैले भने सार्वजनिक गरेको छैन । तर, सञ्चारमाध्यममार्फत प्रतिवेदन भाइरल भइसकेको छ ।